ازاى نحب بعض

هل حسيت انك مش محبوب فى يوم من الايام؟
هل قدرت يوم تحب شخص مش بيحبك؟
هل ضحيت فى يوم من اجل شخص بيكرهك؟
هل سألت نفسك لية انك حاسس ان فى حد بيكرهك أو انك مش قادر تفهم الشخص ده؟
فرحت قلب انسان حزين متالم ولا ضعفت المه وجرحته؟
ما تيجى نتعلم نحب بعض ..
ما تيجى نتعلم نفرح قلب بعض ..

أكيد لما نحب بعض ونفرح قلب بعض .. هايفرح قلب المسيح جداً

هانتعلم 6 أساليب علشان نعبر عن محبتنا لبعض بيهم :

1. ابتسم :

خلى قلبك فرحان مع كل مقابلة لكل واحد ..
وصل للى قدامك محبة اللـه ليك وله .. عن طريق ابتسامة جميلة

فنظر اليه يسوع واحبه (مر 10: 21)
عايزين نتعلم من الرب يسوع ..
ابتسامته اللى مش بتفارق وجهه
مجرد النظر للى حوالينا والابتسامة اللى فى عينينا وقلوبنا .. توصل لغة الحب ..

2. إهتم وشجع :

يااه .. لما تحس انك تعبان وفى أمس الحاجة لحد انه يقولك كلمة حلوة ..
وفجأة تلاقى حد بيطبطب عليك .. بيشجعك .. وبيلمس احتياجاتك

تمام زى ما عمل الرب يسوع مع المرأة السامرية :
الست ديه كانت بتعانى من صغر نفس رهيب .. علشان خطيتها وعلشان نظرة الناس ليها انهاخاطية وماينفعش حد يتعامل معاها
لكن ييجى رب المجد ويقولها "أعطينى لأشرب"
وهى لأنها حاسة بصغر نفس، ترد عليه بعنف شديد "كيف تطلب منى لتشرب"
الله بيشجع كل واحد فينا
عارف ان كل واحد فينا عنده صغر نفس فى ناحية من نواحى حياته
ما تيجوا نطبق الاية اللى بتقول "شجعوا صغار النفوس" (1تس 5: 14)
يعنى شجعوا كل الناس ..
امدحوا كل حاجة حلوة حواليكم ..

يا سلام على اهتمام الرب يسوع بزكا العشار ..
لما وقّف كل الجموع اللى حواليه وبص لفوق وناداه باسمه وقاله انه هايدخل بيته ..
يااه .. أد ايه رفع نفسه وشجعه
لو عايز تحب ابتسم وشجع واهتم **

3. التضحية :
ياااه ايه الكلمة الكبيرة اوى ديه !!
عارف ان الكلمة ديه مفتاح لكل قلب قدامك ..
ضحى علشان خاطر اللى بتحبه : خلى راحته قبل راحتك .. خلى سعادته قبل سعادتك
فكر فى احتياجاته واجرى واعملهاله
فكر فى مشاكله واتواجد جنبه

فكر فى اللى يسوع المسيح بيعمله معاك ..
ضحى براحته ومجده وبكل بهائه واتصلب .. علشان انت تعيش
اتهان واتلطم واتعذب واتجرح .. علشان تتشفى

ليس لاحد حب اعظم من هذا ان يضع احد نفسه لاجل احبائه . (يوحنا 15: 13)

4. المشاركة :
يعنى ايه المشاركة ؟؟!!
شارك اللى انت بتحبه فى افراحه فى مشاكله واحزانه
خليك جنبه .. خليك سند ليه
اتكلم وفضفض واسمع له

كتير مننا بيفتكر انه لما يروح يعزى حد صديقه، لازم يتكلم معاه ويقعد كل واحد فينا يفكر هايقوله ايه هايقوله ايه ؟!
مع ان مجرد وجودك جنب صاحبك ده .. مشاركة
الصلاة من اجله .. مشاركة
انكم تتجمعوا مع بعض حوالين المسيح ..
تقروا فى الكتاب المقدس او تصلوا مع بعض .. مشاركة
عايز تحب الناس بجد ..
ابتسم .. شجع واهتم .. ضحى .. شارك
علشان بجد نقدر نحب الآخر .. لازم :

5. نفهم :

كتير مننا بيحاول دايماً وهو بيتكلم مع صاحبه انه يتكلم يتكلم وبس ..
لكن الشخص اللى قدامى بيبقى عايزنى اسمع .. اسمع وبس ..
تخيلوا معايا لاعب كرة قدم، قرر انه مايسيبش الكورة من رجله ابداً تفتكرو ده هايبقى ماتش ؟؟!

خلينا فى وقفتنا ومشاركتنا للآخر نسمع .. ..
فبالتالى لما نتكلم .. هو هايسمعنا
لأن ببساطة لما نسمع هانفهم .. ولما نفهم هانقدر نحب الآخر

الفهم باللغة الانجليزية اسمه (Under - Standing)
وكأن اللى عمل الكلمة ديه عايز يقول ان كل شخص علشان يفهم
لازم يبقى تحت الشخص التانى ..
الشخص التانى يقف .. وانا تحتيه
بلاش نكون دايماً فى حياتنا (Over - Standing) ..

6. لا تغضب :
الغضب هو من اكتر الحاجات اللى بتخلينا نخسر الناس اللى حوالينا ..
ماحدش بيحب الشخص الغضوب
ماحدش بيحب الشخص اللى على طول بيخانق

لو انت من اللى بيعانوا من مشكلة الغضب ..
عايز أقولك الكتاب بيقول " أغضبوا ولا تخطئوا "
وعلشان غضبك دايما بيوقعك فى مشاكل وبيخسرك اللى حواليك ..
صلى لربنا انه ينزع عنك الغضب .. ويديك سلام حقيقى من عنده
وثق ان ربنا قادر يغير ..
وابدأ معاه فى مشوار التخلص من الغضب ..
وأكيد ربنا يسوع هايغير فيك الجزئية ديه
فى النهاية بقولك عايز تحب زى ماتعلمت من الرب يسوع شجع اهتم ابتشم لا تغضب شارك ضحى حب من قلبك بس قبل ماتحب انظر نظرة ليسوع وشوفه عمل اية علشانك شوف كما من ضحية مفكرش انه هايتالم لكن فاكر فيك حبك ومستنى انك تفتح قلبك علشان يملك على قلبك ويعلمك تحب الاخرين هل هاتفتح قلبك ليسوع؟